Presocratistes

Parte un: La anticas

Parte du: Europa nova

Parte tre: La sentenio 19

Parte cuatro: La sentenio 20

"Sabe se mesma." - enscriveda a la Templo de Apolo a Delfi

Psice, de la elinica "psu-khe", posible derivada de un parola cual sinifia "con sangue calda", sinifia vive, anima, spirito, fantasma, la ego consensa, personalia, o papilio. Alga otra parolas ave sinifias simil: Timos, cual sinifia respira, vive, spirito, tempera, coraje, o vole; Pneuma, cual sinifia respira, mente, spirito, o anjel; Noos, cual sinifia mente, razona, inteleto, o la sinifia de un parola; Logos, cual sinifia parola, parla, idea, o razona.

Psicolojia - razona sur la spirito - ia es probable un parola inventada par la filosofiste e teolojiste deutx Philipp Melanchthon en la media de la sentenio 16. Lo ia es prima usada con la sinifia "studia de la mente" en Psychologia Empirica (1732) e Psychologia Rationalis (1734), ambos par la filosofiste deutx, Christian Wolff.

La elinicas

Elas temprana, 750 - 480 aec

La istoria de filosofia european comensa sempre con la elinicas antica. On no intende dise ce nun ia ave pensas profonda ante los, o ce la filosofias de India e Xina antica ia es en cualce modo inferior. Vera, filosofias de mundo intera ia influe ultima la pensa de la ueste, plu tarda. Ma lo ia es la elinicas cual instrui la Romanes e, pos un eda "oscur", la arcivos de esta mesma elinicas, mantenida e studiada par la scolores muslim e iudi, cual ia instrui Europa denova.

Nos pote demanda perce la elinicas ia es tan temprana en se developa inteletal? Perce no la fenisias, o la punicas, o la persianes, o la etruscas? On ave razonas variosa posible.

Un razona es un caso de la capasia de leje e scrive, cual en sua turno es un resulta de la alfabeta. Cuando ideas es arcivida, ideas entra la istoria inteletal. Budisme, per esemplo, an si lo ia es un filosofia multe sofistica, ia es un tradision de parla per sentos de anios, asta cuando lo ia es rejistrada en scrives, car la alfabeta brami ia ariva tarda. Sola alora budisme pote estende tra Asia intera.

La alfabeta ia es inventada par la semitas de la costa de la mar Mediteraneo, incluinte la ivris e la fenisias, ci ia usa desinias simple per representa consonantes en loca de parolas completa. La fenisias ia pasa la idea a la elinicas, e la elinicas boni la idea par inventa vocales, usante alga leteras cual sua lingua no ia nesesa.

Ante la inventa de la alfabeta, leje e scrive ia es la domina de scrivores spesial, e ia conserna plu con la manteni de arcivos de governa. An en la caso de la fenisias, scrive ia es plu un util de la clase de mercatores, per arcivi sua comersia, ca un modo per arcivi ideas. En elinica, a min en alga site-statos, leje e scrive ia es alga cosa cual "tota" usa.

Par "tota", natural, me intende la omes libre de la clase superior. Laborores, acompaniores, sclavos, e femes ia es descorajida de developa esta capasia. Si vos demanda a vos do ia es la filosofistes fema, la responde es simple: on no ave multe. La poesiste Safo de Lesbos es la plu prosima a un filosofiste fema on pote trova en la arcivos de la mundo antica.

Serta, la alfabeta no esplica tota. Un otra cosa cual ia causa ce la elinicas ia comensa la mundo de la inteleto tan temprana ia es la fato ce los ia comensa temprana la comersia ultra mar. Sua tera e clima ia es oce per cultiva, ma no multe bon; donce, la idea ce on debe intercambia per lo cual on no pote cultiva o fabrica par se mesma ia es fasil reconoseda. E elas es composada cuasi completa de costas e isolas, e la idea de naviga la mares ia es tan fasil reconoseda.

Comersia par naviga dona a un popla la contata con un varia grande de sivilia, incluinte sua relijios, filosofias, e siensas. Esta causa ce persones comensa pensa: si esta popla dise x, e la otra popla de y, e popla tre dise z - cual es la veria? Mercatores es comun seticas.

Ma la fenisias (e sua cusines, la punicas) ia ave la alfabeta prima, e los ia es ance navigores e comersiores eselente. Perce los no ia es la fundores de la istoria de la inteleto european? Posible lo es un caso de sentri. La fenisias ia ave un governa autoritar, controlada par la mercatores la plu potiosa. La punicas ia ave la mesma tipo de governa. Posible, la fato ce los ia es ensircada par imperos autoritar e multe potiosa ia forsa ce los adota acel stilo de governa per survive.

La elinicas, a la otra lado, ia es divideda entra multe site-statos peti, cada unica, cada zelosa autonom, sempre disputa entra lunlotra e comun lutante. Lo pote pare nonvantajosa, ma per ideas, diversia e an desacorda pote es fortinte. Nota ce, cuando Elas ia es unida sur la rena de la macedonianes, la ativia inteletal comensa lenti. E cuando la romanes prende controla, la ativia ia mori cuasi completa.

La fundas

La filosofistes elinica antica ia dona a nos la categorias fundal de filosofia, comensante con metafisica. Metafisica es la parte de filosofia cual atenta responde a demandas como "de cual la mundo es composada?" e "cual es la sustantia ultima de tota realia?"

La elinicas antica ia es entre la primas ci ia sujesta ce on ave un realia "vera" (numeno) su la realia "aparente" (fenomeno). La demanda es cual es esta realia "vera"? Esce lo es materia e enerjia, alga cosa fisical? Esta es nomida materialisme. O esce lo es plu spirital o mental, como ideas o ideales? Este es nomida idealisme. Materialisme e idealisme es la du respondes estrema. Plu tarda, nos va esplora alga otra posibles.

Un aspeta du de filosofia es epistemolojia. Epistemolojia es la filosofia de comprende: Como nos sabe cual es vera o falsa, cual es real o nonreal? Esce nos pote sabe serta cualce cosa, o esce esta un xerca futil?

La elinicas ia descrive du modos oposada per solve la problem de comprende. La un es nomida empiricalisme, cual dise ce tota comprende veni tra la sensas. La otra es nomida razonalisme, cual dise ce comprende es la resulta de razona o pensa. On ave otra respondes en epistemolojia. Vera, empiricalisme e razonalisme ia es nunca completa separada.

La aspeta tre de filosofia cual nos va investiga es etica. Etica es la comprende filosofial de bon e mal, virtuosa e vil. Comun, lo es nomida moralia, e la plu de persones vide la du parolas sinonim. etica deriva de etos, elinica per costum; moralia deriva de mores, latina per costum.

Nos va vide ce etica es la aspeta la plu difisil de la tre. Per aora, nos resta con la du estremas de etica: edonisme e sinicisme. Edonisme dise ce bon e mal es simple un caso de cual me gusta e cual me no gusta, cual dona plaser a me e cual dona dole. Sinicisme dise ce la mundo es a funda mal, e nos pote sola labora per distanti nos de lo e move a la bonia ultima, cual es la Dio.

On ave multe otra aspetas de filosofia: lojica, per esemplo, e estetica, e la filosofia de belia. Ma metafisica, epistemolojia, e etica sufisi per aora.

La ionianes

La filosofia elinica no ia comensa en Elas (como nos reconose lo oji), ma en Ionia, a la costa ueste de Turcia moderna. En la site la plu rica en Ionia - Mileto - ia vive un om, un desendente de fenisias, nomida Tale (724-546). El ia studia jeometria e astronomia en Egipte e otra partes de Asia sude-ueste

Sua responde a la demanda grande "de cual la universo es composada" ia es acua. Vera, acua es un molecula simple, pote deveni un gas, licuida, e solida, e trovada tra la mundo, spesial en viventes, e donce lo no es un responde mal. Esta fa ce Tale no es sola la filosofiste elinica prima, ma la materialiste prima ance. E, car la sustantia ultima ia es nomida fisis en elinica, el pote es videda como la fisiciste prima ance (o, como la elinicas ta dise, la fisiolojiste prima).

Ma nos debe nota ce el ia crede ance ce la universo intera de cosas material es vivente, e ce animales, plantas, e an metales ave spiritos - un idea nomida panpsicisme.

Sua studiante la plu famosa ia es Anaximandro (611-549), ance de Mileto. El es la plu conoseda per desinia la mapa prima de la mundo abitada.

Mapa de la mundo, seguente Anaximandro

Anaximandro ia ajunta un aspeta de evolui a la materialisme de Tale: La universo ia comensa como un masa infinita e nonformida, cual developa tra tempo a la mundo complicada cual nos vide sirca nos. Ma, el ia averti, la universo va reveni a la fini a un masa nonformida!

Plu, el ia dise, la tera ia comensa como un licuida, alga de cual seci per deveni tera e alga de cual vapori per deveni la atmosfera. Vive ia comensa ance en la mar, e deveni gradal la animales de la tera e la avias de la aira.

Como Tale, Heraclito (540-475) ia es un ionian, de Efeso, un distante corta a norde de Mileto. E, como Tale, el ia xerca per la sustantia ultima cual uni tota realia. El ia eleje foco - enerjia - ance no mal un idea.

Seguente Heraclito, la diversia de realia veni de foco par condensa, deveninte prima aira, alora acua, e final tera. Ma esta prosede pote reversa se, la tera licuidi e alora vapori, e final reveni a enerjia pur.

Par eleje foco como sua sustantia ultima, Heraclito produi un vista plu dinamica de realia. Cambia, per Heraclito, es la sola constante. "Panta rei, ouden menei" - tota flue, no cosa resta - es se diseda la plu famosa. El es ance conoseda per dise ce nos no pote pasea en la mesma rio du veses, car acua nova es constante fluente sur nosa pedes.

Foco es ance asosiada en se teoria con la mente o spirito. E, esata como cualce otra foco, la individua debe mori. Un nonmortalia personal no esiste. Sola Dio - la foco divin - es eterna.

En multe modos, Heraclito recorda on de un dauiste elinica. El ia crede ce, an si realia ultima es Un, la mundo cual nos conoseda es construida de duplias, con cada polo nesesante la esiste de sua oposante: supra nesesa su, blanca nesesa negra, bon nesesa mal, etc.

E el vide esta oposas como la fonte de armonia, notante ce, estra ce tu estende la cordetas de tua arpa en du dirijes oposante, tu no pote crea musica.

E, ancora como la dauistes, el ia crede ce la modo la plu bon per vive es en armonia con natur. Ma el ia mori solitar, con 70 anios, car el ia odia la acompania de umanas!

La elinicas de Italia

Pitagora

Un otra ionian ia es Pitagora (582-500). Pos viajante a multe paises, de Galia (moderna Frans) a Egipte e India, el ia resta en Crotona, un porto de Italia sude. Italia sude ia es la colonia la plu grande de elinicas estra Elas, cual la romanes ia nomi Magna Grecia ("Elas grande"). Ala, el ia fundi se scola famosa.

Sua scola ia es plu como un comunia grande, e sua filosofia ia es plu como un relijio. Car los ia crede en reincarne, tota sua seguores ia es vejetalistes. Los ia evita a bevi de vino, jura par la dios, malcondui sesal, suprafluentes, e nonseria. Per la sinco anios prima, un scolor nova segue un jura de silentia. E femes ia es tratada como la egales de omes - un raria vera en la mundo antica!

Sua filosofia ia es fundida en matematica, cual sinifia jeometria a la elinicas antica. Pitagora es reconoseda con un cuantia de demostras jeometrial, la plu notable la teorem pitagoran: La soma de la cuadridas de la du lados de un triangulo reta egali la cuadrida de la ipotenusa. El ia descovre la funda matematical de musica, e ia vide la mesma motifes en la moves de la planetas. El ia es la person prima ci ia reconose ce la tera, la luna, e la planetas es sferas - cual es la orijina de la espresa "la musica de la sferas". E el ia vide la leges refinada de jeometria como la funda de la universo intera.

Donce, en loca de xerca per un comprende de la universo en la move de materia e enerjia, el ia xerca per la leges de natur, la idea en loca de la sustantia. Ma, car esta leges esiste sola en la mente, nos nomi Pitagora un idealiste.

An si sua vive resta misteriosa, sua scola dura 300 anios, e ia influe profonda sur tota ci segue, spesial Platon.

En Elea, un otra porto en Italia sude, nos trova Xenofane (570-475). El es conoseda la plu bon per se nega de la esiste de la dios elinica:

"Mortales imajina ce la dios nase, porta vestes, e ave vose e forma como se mesma. Ma si boves e leones ia posese manos, e pote pinta e sculta como omes, los ta crea la depintas e imajes de sua dios en la formas de se mesma; cavalos ta crea los como cavalos, boves como boves. Itiopianes imajina se dios con peles negra e nases corta; tracianes dona a se dios oios blu e capeles roja." (de Diogenes Laertes "Xenophanes," iii.)

On ave sola un Dio, el ia dise, e el es la universo, Natur. Esta vista es nomida panteisme. Xenofanes ia dise ce tota cosas, an umanas, ia evolui de tera e acual par leges natural. Ma cosas e umanas debe resta sempre plu inferior ca la realia ultima, Dio-Natur.

Parmenide (540-470) de Elea ia es un disiplo de Xenofanes, e ta ave un influe potiosa sur Platon. El ia estende la conseta de Xenofanes de un Dio par dise "Hen ta panta", tota cosas es Un. Realia ultima es un constante. An si nos regarda como un mundo de cosas e moves e cambias es no plu ca un ilude.

Un de la disiplos de Parmenide ia es Zeno de Elea (490-430 - no debe es confusada con Zeno de Citio, cual nos va regarda en un capital plu tarda). Zeno ia scrive un libro de paradoxes famosa, incluinte la narada de Aciles e la tortuga: Ta ce nos dona un comensa plu avansada a la tortuga. Cuando Aciles ateni la loca a cual la tortuga ia comensa, la tortuga ia move ja un distantia peti plu. Cuando Aciles ateni la loca a cual la tortuga ia avansa, la tortuga ia move ja u otra distantia plu. E la mesma situa continua. Donce, Aciles pote nunca pasa la tortuga! La sinifia de esta narada (e tota de la naradas) es ce move es un ilude.

Per mostra sua idea, el ia inventa la forma de debate dialetica nomida "redui a asurdia". Ma, si la narada de Aciles e la tortuga pare strana, nota ce sua razonas no es demostrada, car el ia era par vide move, tempo, e spasio como un cuantia infinita de puntos, en loca de continuante.

La abderanes

Democrito, la filosofiste riente, par Rembrandt

Leucipo (ativa sirca 440) ia es de Mileto en Ionia, la site de Tale e Anaximandro. El ia studia con Zeno a Elea, e alora comensa instrui en Abdera, un colonia elinica a la costa sude de Tracia (aora Elas norde-este).

An si sola un frase de sua instruis ia resta, Leucipo va es sempre reconoseda como la om ci ia inventa la ideas de la atom, spasio vacua, e causa-e-efeto. An la spirito, el ia dise, es composada de atomes.

Democrito (460-370) de Abdera, la studiante de Leucipo, ta prende esta ideas e developa los a un filosofia plen. El ia viaja estendosa, ia scrive libros sur cada sujeto, e ia es videda como la egal de la filosofistes grande, Platon e Aristotele. Ma el no ia funda un scola, e donce sua ideas no ia ave la mesma efeto sur sivilias seguente como los de Platon e Aristotele.

Democrito ia es multe setica de datos e ia introdui la idea de cualias du: Cualias como color e sona e sabor es plu en la mente ca en la cosa se mesma. Plu, el ia dise ce sensas es en realia atomes cadente sur la organos de sensa, e ce tota sensas es esensal forma de toca.

El ia introdui ance la idea ce nos identifia cualias par costum, pd nos nomi cosas dulse "dulse" e acel ata (e no un cualia de la cosa se mesma) es cual fa ce nos grupo los con lunlotra. Esta idea es nomida nominalisme, de la parola latina per nom. Esta modo de pensa no va aveni denova asta la Eda Media tarda.

La spirito o mente, el ia dise, es composada de atomes peti, lisa, ronda, simil a la atomes de foco o enerjia, e los pote es trovada tra la corpos intera de umanas, animales, e an la resta de la mundo.

Seguente Democrito, felisia veni de la oteni de sabe e, ultima, sajia. Plaser sensal aveni per tan corta tempo e es tro nonconstante per nosa depende. En loca, la om o fem saja debe xerca per pas de mente (ataraxia) par manteni bon umor, modera, e un vive ordinada. Sua teoria de moralia es fundida sur un senti de virtua personal: "un om debe senti plu vergonia per fante malia ante se mesma ca ante la tota mundo."

Democrito no ia crede en dios o vive pos mori. En fato, el ia formida un organiza ateiste nomida la Kakodaimoniotai - "la club de demones". El es a veses nomida la filosofiste riente, car el ia trova ce vive pote es multe plu felis sin los cual el ia considera la superstisios depresante de relijio.

Democrito ia aseta seria la materialisme de Leucipo, e ia nota ce materia no pote es creada o destruida, ce on ave un cuantia infinita de mundos como la nosa, e ce fortuna no esiste, sola causa. Multe sentenios debe pasa asta esta ideas ta es denova popular.

Plu vea ca Democrito ia es Protagora (480-411), ance de Abdera. El es la plu famosa de un grupo de filosofistes nomida la sofistes. La parola deriva de la elinica sofistai, cual sinifia instruores de sajia, pd profesores. Car alga de esta profesores ia ensenia no multe plu ca como on pote gania debate en cortes legal, e car la fatura per sua servis ia es multe grande, la nom ia deveni alga degradante. Sofisme sinifia aora debate per causa de debate, o per profita personal. Ma nota ance ce lo es la radis de la parola "sofistica".

Protagora, an si sua fatura per instrui ia es, en fato, alta, ia es un filosofiste seria. On atribui a el la fundi de la siensa de gramatica, e ia es la prima ci ia distingui la conjugas variosa de verbos e la declina de nomes. El ia es ance un contribuor major a lojica e ia usa la metodo socratiste (instrui par demanda e responde) ante Socrate.

El ia es un setica, e ia crede ce no verias ultima esiste, ce veria es un cosa relativa e sujetal. "Umania es la mesura de tota cosas" es se sita la plu famosa, e sinifia ce cosas es cual nos dise los es.

Aplicante esta seticisme a la dios, el ia asusta la potias de Atina, e ia es comandada a parti de Atina. Lo pare ce el ia afoca a la viaja a Sisilia.

En esta ambiente rica con ideas ta veni la tre atinanes cual ta domina filosofia per la 2000 anios seguente: Socrate, Platon, e Aristotele.